Cursos de alfabetizatzione e de grammàtica de sa limba sarda.
Si informada ca s’Unione de Comunes nostra, a intro de su progetu Barigadu in limba finantziadu dae sa Presidèntzia de su Consìgiu de sos Ministros e dae sa Regione Autònoma de Sardigna gràtzias a sa L. 482/1999 e a sa L.R. 22/2018 pro s’annu 2021, cuncordat duos cursos de alfabetizatzione e de fungudamentu grammaticale in limba sarda.
Sos cursos sunt gratis e abertos a totu sos tzitadinos interessados, a sos maistros de iscola e professores, a sos cummertziantes, a sos artesanos, a su personale dipendente de sos Comunes, a totu cussos chi impreant giai (o chi cherent impreare) su sardu ònnia die in sas fainas issoro.
Sos cursos ant a tènnere una dura de 30 oras, chi s’ant a isboligare intra de sos meses de cabudanni, santugaine e santandria de su 2022. Pro chistiones logìsticas, sos cursos s’ant a fàghere cun presèntzia fìsica de sos dischentes in sos duos Comunes de Barigadu in ue ddoe at a àere su nùmeru prus artu de domandas de partetzipatzione, cun possibilidade però, pro chie ddu cheret, de pòdere sighire su cursu dae domo etotu, in lìnia.
Regordamus chi, pro ddos pòdere incarrerare, in onni cursu si ddoe depent iscrìere a su mancus 20 persones, cun s’impignu de sighire su cursu pro a su mancus 21 de sas 30 oras prevìdidas. A s’agabbu de su cursu ddoe at a àere un’esàmene e s’Unione de Comunes at a dare s’atestadu de frecuèntzia a sos dischentes.
S’iscritzione cheret fata a intro de lunis 19 de cabudanni de su 2022, compilende su mòdulu alliongiadu e mandende-ddu a s’indiritzu de posta eletrònica isportellu.limba.barigadu@gmail.com o mandende-ddu cun posta normale a s’indiritzu Unione de sos Comunes de Barigadu - Cussòrgia Giolantine – 09082 BUSACHE (Aristanis) o cunsinnende-ddu a manu in oràriu de ufìtziu a su Comune de Fordongianus, in ue tenet sa sea sua s’Isportellu linguìsticu.
Pro informos faghet a iscrìere a s’indiritzu isportellu.limba.barigadu@gmail.com o a telefonare a su nùmeru 349/6025986.
Alliongiamus su mòdulu de iscritzione.
